Rabu, 08 Juni 2016

Kultura Timor Leste

Hosi lorosa’e to’o loromonu, hosi tasi feto to’o tasi mane, ita bele haré oin sa timoroan moris, oin sa hadulur malu, oin sa sira tau neon metin ba matebian sira. Ita bele haninu mos oin sa sira moris tuir lisan hafoli, oin sa sira hana’i matebian, oin sa ema hotu, iha knua laran, mesa maluk de’it, mesa naan de’it.
Iha Rai Timor, hosi rai ida ba rai ida, ita bele rona ida-idak nia lia, ita bele haninu rai ida-idak nia liasan.
Iha Rai Timor ita bele rona lia barak, maibé sanulu resin lima maka hatán ema barak, hodi moris tuir lisan sel-seluk.
Timoroan, nu’u uai-uain, hatene ko’alia lia rua:
  • lia ida mai hosi nia hun, nia uma laran; maski moris iha rai dook, hatene ko’alia lia ne’e, hatene halia maluk e sasán, buka moris nafatin tuir bein sira nia lisan.
  • lia seluk hatene uainhira moris iha reinu seluk. Nune’e, sai hosi uma laran, hodi lia tetun ko’alia ho ema seluk; la os tetun-los e tetun-terik, maibé tetun ida ne’e be ema hotu iha Rai Timor ko’alia uainhira hasoru malu. Lia tetun ida ne’e be ita hodi haknauk, hodi hatene katesismu, lia ida ne’e be na’i lulik sira haklaken Kristu nia Liafuan.
Ita bele hetan lia barak, lisan barak, maibé tuir lisan barlake, tuir ukur matebian timoroan hotu simu malu nu’u abut ida de’it, bein ida de’it …
Lisan barlake hametin uma kain ida ho knua seluk; matebian sira la tuur iha fatin seluk, maibé matebian hadulur ho maluk iha knua laran, tan ne’e ema ida la leet iha nia knua, ema ida la leet iha reinu seluk.
Timoroan hotu fiar iha lulik bein ida – maromak – ne’e be ita sei hana’i, sei hamulak hodi bele hetan di’ak, bele moris dame.
Iha knua laran sei harii Uma Lulik atu haloot sasán lulik no lima-rohan bein siran. Lulik na’in e dato lulik maka sei tau liman ba Uma Lulik hodi halo ukur tuir lisan atu kuda rai e sal rai. Sira de’it maka bele tama iha Uma Lulik.
Timoroan sira fiar katak amtebian sira la bá fatin seluk, maibé tuur hela iha foho lulik e fatin lulik.
Matebian ho ema hotu ne’e be sei moris, hadulur hela malu, tan ne’e timoroan fiar katak ida-idak moris tuir karik matebian nia rohan, nia moris sei la kotu. Tan ne’e molok há’e sei moris, ida-diak sei halo di’ak, sei tau liman atu ema seluk hetan rahun di’ak.
Timoroan fiar katak atu hetan rahun di’ak, sei moris tuir dalan maromak. Tan ne’e molok halo knar boot ruma, knua tomak sei hamutuk hasa’e ukur atu husu matebian sira nia tulun, atu hetan maromak nia kmanek.